Abh koi Raah bhi aasaan Nahi Dekhnay Main
غزل
اب کوئی راہ بھی آسان نہیں دیکھنے میں
دیکھتے رہتے ہیں اور دھیان نہیں دیکھنے میں
کتنی ویران نظر آتی ہے تا حد نظر
یہی دنیا کہ جو ویران نہیں دیکھنے میں
ان دنوں فرصتِ تعبیر کہاں ممکن ہے
ان دنوں خواب بھی آسان نہیں دیکھنے میں
ویسے تو ہجر میں اُس کو بھی نہیں کوئی ملال
ویسے تو میں بھی پریشان نہیں دیکھنے میں
اُس جگہ بھی کوئی امکان نکل آتا ہے
جس جگہ کوئی بھی امکان نہیں دیکھنے میں
مقصود وفا
Maqsood Wafa