اتنا عجب سماج میں یہ واقعہ نہیں

اتنا عجب سماج میں یہ واقعہ نہیں
لٹ جانا چاہتوں کا کوئی مسئلہ نہیں

ترکِ تعلقات بھی اس ہی کا حکم تھا
بنیاد اس ستم کی مرا فیصلہ نہیں

گزری فراقِ یار میں کچھ یوں تمام رات
کوئی دیا امید کا چھت پر جلا نہیں

اس شہرِ پر فریب میں کھویا ہے اس طرح
ہم نے پکارا لاکھ مگر وہ ملا نہیں

عالمِ ہو بے بسی کا بھلا بڑھ کے اس سے کیا
یونٹوں پہ میرے اب کوئی حرفِ دعا نہیں

ویسے تو اک ہجوم ہے آلام کا مگر
پہلا سا شہرِ دل میں وہ محشر بپا نہیں

اب تو فراقِ یار میں آنکھیں بھی خشک ہیں
جیسے کہ زندگی میں کوئی غم رہا نہیں

اک تیرا ساتھ تھا مرے ہر درد کی دوا
اب تو نہیں تو کوئی میسر دوا نہیں

اب تو خیال و خواب ہوئیں خواہشیں تمام
اپنا ہی سامنا کروں یہ حوصلہ نہیں

یہ کیسی بے بسی ہے رہِ زیست میں رجب
منزل قریب تر ہے مگر راستہ نہیں

رجب چودھری