ایسے کہ پھول بند قبا سے نکل پڑے

Aysay kay phool Band e qaba say nikal Paray

غزل

ایسے کہ پھول بند قبا سے نکل پڑے
جیسے حیات دست فنا سے نکل پڑے

تازہ ہوا کا جھونکا بھی آیا کہیں سے یوں
فرحت گھٹن میں جیسے ہوا سے نکل پڑے

تجھ کو تخیلات کے آنگن میں دیکھ کر
چاہت کے راگ صوت صبا سے نکل پڑے

جتنے بھی زخم اس نے دیے روح پر مجھے
اتنے ہی پھول حرفِ دعا سے نکل پڑے

ضبط وفا نے رکھا ہوا تھا مرا بھرم
شکوے ہزار طرزِ جفا سے نکل پڑے

لہجے کے روک وار تو ایسا نہ ہو کہیں
اندر کا شور ضبط انا سے نکل پڑے

احساس یہ ہوا ہے ترا ساتھ چھوڑ کر
خود کو بچا کے دشت بلا سے نکل پڑے

اس نے مصالحت کا اٹھایا ہے گر قدم
اپنے قدم بھی قصر انا سے نکل پڑے

تاریکیوں میں جب بھی لیا دل نے اس کا نام
جگنو ہزار کنج قضا سے نکل پڑے

تابشِ اٹھا جو پہلا قدم خیر کی طرف
لشکر جزا کے باب خطا سے نکل پڑے

شہزاد تابشِ

Shahzad Tabish