رَہتا ہے کوئی شَب ہو سَحَر ، میرے چار سُو
تُو یا تِری نظر کا اثر ، میرے چار سُو
تیرا وجود ، میرے گماں کا اَسیر ہے
اور تیرا عَکس حَدّ ِ نظر ، میرے چار سُو
رَہ رَہ کے دَھیان جاۓ گا سَب کا تِری طرف
رَوشن ہوۓ چَراغ اگر ، میرے چار سُو
تجھ کو تَراشتا ہوں میں شَعروں میں ڈَھال کر
ہے رَوشنی بَہ رَنگ ِ ہُنر ، میرے چار سُو
خوابوں کا اِک جَزیرہ ، مَہکتے سے رات دِن
کیسا رہا فَریبِ نَظر ، میرے چار سُو
کِھلتے گلاب دیکھے تھے میں نے تو خَواب میں
اِک آگ ہے ، دھواں ہے مَگر ، میرے چار سُو
اَب کیا اڑان بَھریے کہ جب دِل ہی بجھ گیا
ٹوٹی ہے آس ، بِکھرے ہیں پَر ، میرے چار سُو
سَب جانتے ہیں میری حقیقت ، کہ آگ ہوں
پھر بھی ہیں لوگ مَحوِ سَفر ، میرے چار سُو
تجھ کو پکارتا ہے ، سَمندر ہے مضطَرِب
گاتی رہی ہوا یہ خَبر ، میرے چار سُو
لیتا ہے کیوں بَلائیں یہ صَحرا میری ، عظیم
رَقصاں ہیں کیوں یہ شَمس و قَمر ، میرے چار سُو