ریت پھانکی گئی اور دھول اڑائی گئی ہے

Reet Phaanki Gaee aur dhool Urraai gaee Hay

غزل

ریت پھانکی گئی اور دھول اڑائی گئی ہے
دشت میں دور تلک آبلہ پائی گئی ہے

سلسلے کن فیکوں کے ہو گئے سارے تمام
لاش میری کسی صحرا سے اٹھائی گئی ہے

تیری آنکھوں کا یہ پھیلا ہوا کاجل توبہ
روح تک چشمِ نمیدہ کی رِسائی گئی ہے

میں پہاڑی سے علاقوں کا ہوں چرواہا
اور تو ناقہ فروشوں میں بنائی گئی ہے

رات کاٹی گئی سبزے سے بھرے کھیتوں میں
صبح دم اوس ترے لب سے اٹھائی گئی ہے

کھینچتی ہیں یہ ہری پور کی شامیں مجھ کو
تو کراچی کی ہواؤں میں بسائی گئی ہے

چاک پر کن کے مراحل سے گزرتی مٹی
خاک میں پھر فیکوں کہہ کے ملائی گئی ہے

وہ کئی بار کسی جھوٹی خبر پر حامیؔ
میرے دیدار کو دہلیز پہ آئی گئی ہے

حمزہ حامیؔ

Hamza Haami