کوئی فکرِ تلافیء ستم سے کیوں پریشاں ہے
وہاں تک تو میں حاضر ہوں جہاں تک میرا امکاں ہے
یہ دیوانے ہیں جو کچھ بھی کہیں تم ان کو کہنے دو
بیاباں پھر بیاباں ہے گلستاں پھر گلستاں ہے
وہاں کیا حال پر میرے کوئی آنسو بہائے گا
جہاں اک مضحکہ سیلِ روانِ چشمِ گریاں ہے
کرشمہ سازیاں دیکھے تو کوئی ان کی محفل میں
کوئی جاکر پشیماں ہے کوئی آ کر پشیماں ہے
مآلِ جوشِ وحشت دیکھیے کیا رنگ لائے گا
ابھی تو صرف اپنا ہاتھ ہے اپنا گریباں ہے
بہاریں خار بن بن کر نظر کے پار ہوتی ہیں
میسر اب کہاں نظارہء حسنِ گلستاں ہے
یہ رازِ زندگی اے عیش کیا ہے کون بتلائے
کہیں یہ خواب راحت ہے کہیں خوابِ پریشاں ہے
عیش ٹونکی