غزل
آئیے دہر میں انسان کا چہرہ ڈھونڈیں
بے یقینی میں بھی امکان کا چہرہ ڈھونڈیں
اہل فن دامن اخلاص طلب کرتے ہیں
شہر کی بھیڑ میں پہچان کا چہرہ ڈھونڈیں
عدل پر اپنے سرابوں کا اثر حاوی ہے
دوستوں آؤ کہ میزان کا چہرہ ڈھونڈیں
بھوک سے لوگ تڑپتے ہیں گھروں میں اپنے
اہل ثروت میں ہم احسان کا چہرہ ڈھونڈیں
کھیت میں فصل سحر پکنے لگی ہے پھر سے
ہم ہر اک دانے پہ دہقان کا چہرہ ڈھونڈیں
ہیں ہجوم غم دوراں سے پریشان تو کیا
اپنے اسلاف کے ایوان کا چہرہ ڈھونڈیں
یاس و حسرت کی ریاست میں نہیں ہم تنہا
قریہ قریہ چلو ہیجان کا چہرہ ڈھونڈیں
عبدالمتین جامی