غزل
آسماں سرخ ہوا نالۂ شب گیر کے بعد
حال دل اس پہ کھلا ہے بڑی تاخیر کے بعد
طلب خواب میں کتنی تھیں پریشاں آنکھیں
کتنی حیران ہیں اب خواب کی تعبیر کے بعد
کھل تو سکتے تھے مری آنکھ پہ منظر کئی اور
میں نے دیکھا ہی نہیں کچھ تری تصویر کے بعد
زندگی کٹتی رہی اور مرے پیروں میں
ایک زنجیر پڑی دوسری زنجیر کے بعد
معرکہ اب کے محبت میں عجب گزرا ہے
ہاتھ خالی ہی رہے لمحۂ تسخیر کے بعد
کوچۂ حرف میں یہ جان کے آئے خاورؔ
میرؔ سا میرؔ سے پہلے نہ ہوا میر کے بعد
اقبال خاور