غزل
ابھی تک تشنۂ تکمیل میری زندگانی ہے
ابھی تک انتظار دوست کی باقی کہانی ہے
یہ اپنی زندگی رمز من و تو کی کہانی ہے
نہ کچھ قرب مکانی ہے نہ کچھ بعد زمانی ہے
مرتب کر رہا ہوں داستاں حسن گریزاں کی
طبیعت میں بروئے کار دریا کی روانی ہے
تمہارا حسن بھی کامل ہمارا عشق بھی قابل
نہ اس کا کوئی ہمسر ہے نہ اس کا کوئی ثانی ہے
جمالیؔ یاس و حسرت کے سوا کچھ بھی نہیں پایا
یہ اپنی زندگی برگشتہ قسمت کی کہانی ہے
بدر جمالی