اب اور دیگی ہمیں کیا خوشی زمانے کی

Ab aur deegi Hamain kia Khushi Zamany ki

غزل

اب اور دیگی ہمیں کیا خوشی زمانے کی
ہمیں تو غم میں بھی عادت ہے مسکرانے کی

محبّتوں کے کئی راز منکشف ہوں گے
کُھلےگی جب بھی حقیقت مرے فسانے کی

کئی تو آج اِسی سوچ میں پریشاں ہیں
فلاں سے دوستی کیوں ہو گئی فلانے کی

تمہاری دید مرے واسطے ہے نذرانہ
تمہارے واسطے زحمت ہے آنے جانے کی

ہر ایک بزم میں ہے آج تتلیوں کا ہجوم
ادائے خاص ہے یہ بھی نئے زمانے کی

شجر کے سائے میں جو دل مرا لبھاتی تھی
وہ نغمگی تھی پرندوں کے چہچہانے کی

جگر پہ تیر چلا تُو عدیل کے سیدھا
یہی ہے سب سے مناسب جگہ نشانے کی

اسرار عدیل نور پوری

Israr Adeel Noor puri