اتنی شمعیں جل رہی ہیں بزم میں
تیری جانب دیکھنا دشوار ہے
بچیاں شمعیں جلاکے لائی ہیں
ساتھ میں آشاؤں کی ملہار ہے
سینکڑوں ہیں زندگی کے دائرے
سب کے مرکز کا الگ معیار ہے
زندگی میں جب ڈھلے گی شام غم
زیست کہہ دے گی سفر تیار ہے
تم بھی کس موسم میں آئے ہو یہاں
شہر میں اب خوف کی یلغار ہے
آئنے میں دیکھ کو یاد آئے گا
سانحے کا کون ذمے دار ہے
جیتنے کی آرزو بھی کس لیے
ایک غم تو اک خوشی تیار ہے
چلتے چلتے یہ نگاہیں جھک گئیں
راستے میں روشنی دیوار ہے
ریحانہ احسان