اس موسم کے پھل کڑوے ہیں پھولوں میں بھی رنگ نہیں

غزل

اس موسم کے پھل کڑوے ہیں پھولوں میں بھی رنگ نہیں
طائر ہیں محتاج نشیمن نغموں میں آہنگ نہیں

اس کے فتنوں کی سرکوبی صلح سے پہلے واجب ہے
غیر کی پیدا کردہ شورش ہے آپس کی جنگ نہیں

تیغوں کی جھنکار میں بھی اک وجد آور کیفیت ہے
روح کو جولاں کرنے والے صرف رباب و چنگ نہیں

فائدہ اس میں جو ہو کسی کا اپنا خون سجل کر دیں
جان چرائیں مرنے سے ہم ایسے بھی دل تنگ نہیں

اہل جنوں کے سب دشمن ہیں دیوانوں سے کہہ دیجئے
ان سے بھی ہشیار رہیں وہ جن ہاتھوں میں سنگ نہیں

محمود سروش