اچّھے بھلے تھے یار اچانک یہ کیا ہوا – Achay bhalay thy yar achanak ye kya hua

اچّھے بھلے تھے یار اچانک یہ کیا ہوا
ویراں ہیں خواب زار اچانک یہ کیا ہوا

تو ہم نشیں ہمارا تھا اوروں کا تو نہیں
غیروں سے ہمکنار! اچانک یہ کیا ہوا

محور سے ہٹ کے تو نے تماشا بنا دیا
اے یارِ نامدار اچانک یہ کیا ہوا

یارانِ دل بھی اہلِ زمانہ سے ہو گئے
ایسا نہ تھا شِعار اچانک یہ کیا ہوا

ساقی وہ ساری رونقیں معدوم پڑ گئیں
بادہ نہ بادہ خوار اچانک یہ کیا ہوا

میرا بھی ہنسنا کھیلنا جانے کدھر گیا
تو بھی ہے سوگوار اچانک یہ کیا ہوا

رخسار گرد گرد تو ہونٹوں پہ پپڑیاں
دامن بھی تار تار اچانک یہ کیا ہوا

جاوید حالِ زار بیاں سے ہے ماورا
مُختار و کِردِگار ! اچانک یہ کیا ہوا

آصف جاوید