اےہم نفساں کارِتنفس بھی عجب ہے
ہوتا ہے تو لگتا ہے کہ ہونے کے سبب ہے
کس باب میں ہم تختیِ دوراں پہ لکھے جائیں
منصب نہ علاقہ نہ کوئی نام و نسب ہے
تاریکیِ شب میں مرے ہونے کی گواہی
اک موجِ ہوا تھی سو وہی مہر بلب ہے
آ جائے تو آنکھوں کی طنابیں کھنچی رہ جائیں
دیوار کے اس پار جو اک ماہ لقب ہے
دنیا ہے کہ نکلی چلی جاتی ہے کماں سے
دل ہے کہ کسی زعم میں آرام طلب ہے
اے موجِ غمِ یار مری یاد سرا میں
آنابھی غضب ہے ترا جانا بھی غضب ہے
یہ شامِ ملاقات سلامت کہ ہماری
اس شہرِدل آویز میں بس آخری شب ہے
طارق نعیم