Ayee Aah bay qarar zara deer to Tehar
غزل
اے آہِ بےقرار ذرا دیر تو ٹھہر
آجائے گا قرار ذرا دیر تو ٹھہر
کچھ دیر کو ٹھہر کہ مرے درد کی دوا
ہو جائے دل فِگار ذرا دیر تو ٹھہر
کچھ انتظام نالۂ ِشب گیر کے لیے
دامن ہو تار تار ذرا دیر تو ٹھہر
روح و بدن کے بیچ نئی جنگ چِھڑ گئی
اب جیت ہو یا ہار ذرا دیر تو ٹھہر
لکھوں گا میں غزل نئے مضموں تلاش کر
بڑھنے دے انتشار ذرا دیر تو ٹھہر
ہر قافیہ پڑھانے لگا مجھ کو ضابطے
شاعر نہیں ہوں یار ذرا دیر تو ٹھہر
خالد سے بد گمان نہ ہو اے رفیقِ جاں
یہ دل ہے خاکسار ذرا دیر تو ٹھہر
خالد میر
Khalid meer