بات مت کر تو اس ستم گر کی

Baat mat kar tu us sitmgar ki

غزل

بات مت کر تو اس ستم گر کی
بات کر مجھ سے تو دسمبر کی

فیض ملتا نہیں جہاں سے کبھی
دھول چاٹے ھے کیوں اسی در کی

ہیں خیالات قیمتی لیکن
بات کرتا ہے تُو ٹکے بھر کی

تجھ کو دیکھا عدو کی بانہوں میں
جھوٹی قسمیں نہ کھا مرے سر کی

آج بادِ صبا کے ہوتے ہوئے
کیوں کریں بات بادِ سرسر کی

جھاڑ مت اس طرح وچار یہاں
لے خبر پہلے جا کے تو گھر کی

اس غریبی میں بات شاہانہ
بات مت کر تو سنگِ مرمر کی

اس مہینے کے ہیں کئی شیدا
تو بھی کہہ لے غزل دسمبر کی

کیا نظر میں سما گیا منظر
ہے کوئی بات نصف بہتر کی

نظر فاطمی

Nazar Fatmi