بنائے گا مری بگڑی جو بات نام رسول
کرے گا دور مری مشکلات نام رسول
میں اٹھتے بیٹھتے ان کا ہی نام لیتا ہوں
ہے اک خزانہء حسن صفات نام رسول
ازل سے لے کے ابد تک چراغ کی صورت
جمال انجمن ممکنات نام رسول
جہاں تلک مری سانسوں کی ڈور جائے گی
کرے گی ورد یہ میری حیات نام رسول
میں دیکھتا ہوں کرم کی ہیں بارش مجھ پر
مری امیدوں کی ہے کائنات نام رسول
مری حیات کا ہر پل انہی سے روشن ہے
مری حیات کے سارے جہات نام رسول
سبب نجات کا ہوگا یہی تو محشر میں
تمہارا ورد ہو رونق حیات نام رسول
رونق حیات