بنوا رہا ہوں بنگلہ میں شہر مری کے ساتھ
رہتی اگر وہ شوخ بھی نتھیا گلی کے ساتھ
دیوان اپنے سامنے رکھ کر کبھی تو سوچ
کھلواڑ ہے یہ کتناترا شاعری کے ساتھ
دیکھا ہے ایک پنڈ میں منظر عجیب سا
کھوتا بندھا ہوا تھا وہاں مارکی کے ساتھ
میں اس کو کیک رس نہ کسی دن کھلا سکا
ملتی تھی جو ہمیشہ مجھے بیکری کے ساتھ
ڈرتا ہوں میرے بچے کہیں اس کو پڑھ نہ لیں
جو داستاں پڑی ہے مری لوفری کے ساتھ
اتنا بھی تجربہ نہیں میرا فلرٹ کا
چکر چلا رہا ہوں ابھی تیسری کے ساتھ
یہ سین میری روح پہ آرا چلا گیا
اک بھوت چل رہا تھا سڑک پر پری کے ساتھ
کیسے کہوں میں اس کو مجدد لسان دان
اردو جو بولتا ہو غلط، فارسی کے ساتھ
ہم دونوں کی ہیں اپنی دھڑے بندیاں میاں
تم شاعرہ کے ساتھ ہو، میں شاعری کے ساتھ
فیصل غضب کی حسن ضیافت ہوئی مری
آئس کریم پیش کی جاناں نے ٹی کے ساتھ
ڈاکٹر عزیز فیصل