بے جا گریز پا نہیں مجھ سے مرے عزیز – Be ja guraiz pa nahi mujhse mere aziz

بے جا گریز پا نہیں مجھ سے مرے عزیز
میری اُداسیوں سے ہیں ڈرتے مرے عزیز

گور و کفن کے واسطے آئے ہیں یوں کہ بس
فاقوں سے مرتے وقت کہاں تھے مرے عزیز

تا عمر چیخ چیخ جتاتا رہا ہوں میں
تا عمر میرا درد نہ جانے مرے عزیز

تا عمر بھول کر بھی نہ پوچھا کسی نے حال
تا عمر پھر بھی دل سے نہ اُترے مرے عزیز

تا عمر ایک بات معمّا بنی رہی
کیونکر ہیں میری جان کے درپے مرے عزیز

افسوس بات بات کو سمجھوں میں ایک بات
افسوس! ایک بات نہ سمجھے مرے عزیز

روزِ حساب دیں گے گواہی مرے خلاف
صوم و صلاۃ بعد میں پہلے مرے عزیز

تنہائیوں کی دھوپ میں جاوید کو بہ کو
پھرتا ہوں میں پکارتا ہائے مرے عزیز

آصف جاوید