تا ابد زمانے پر سلطنت ہماری ہے
دوست اور دشمن سے انسیت ہماری ہے
تم نے کیا نہیں دیکھا سرنگوں فرشتوں کو
کتنی اعلیٰ و ارفع مرتبت ہماری ہے
نور ہو جو آنکھوں میں آئے گا نظر تم کو
نوری سب جبینوں پر تمکنت ہماری ہے
خلق سے محبت ہے حُسنِ خُلق فطرت ہے
قلب کی زمینوں پر مملکت ہماری ہے
آئینے کو دیکھو گے صاف صاف کہہ دے گا
خود تمہاری آنکھوں میں منقبت ہماری ہے
حُسن کی حکومت ہے چار سو زمانے میں
ہر حسین چہرے پر مسکنت ہماری ہے
تم سمجھ نہ پاؤ گے امرِ غیب ہیں جتنے
روح میں سما جانا مکرمت ہماری ہے
جس کو چاہے دیتے ہیں عمرِ جاودانی بھی
کیا سخی تو سمجھے گا مصلحت ہماری ہے
سخی سرمست