جانے اس شخص کو یہ کیسا ہنر آتا ہے

Jaany Us Shakhs Ko yeh kaisa Hunar Aata Hay

غزل

جانے اس شخص کو یہ کیسا ہنر آتا ہے
رات ہوتی ہے تو آنکھوں میں اتر آتا ہے

اس کی چاہت کا تو انداز جدا ہے سب سے
وہ تو خوشبو کی طرح روح میں در آتا ہے

بات کرتا ہے تو الفاظ مہک اٹھتے ہیں
جس طرح شاخ محبت پہ ثمر آتا ہے

پھول اس کے لب و رخسار پہ مر مٹتے ہیں
پیار شبنم کو بہ انداز دگر آتا ہے

ایسا تتلی سا وہ نازک ہے کہ چھو لینے سے
رنگ اس کا مرے ہاتھوں پہ اتر آتا ہے

تم تو کانٹوں ہی سے گھبرا کے پلٹ جاتے ہو
عشق تو آگ کے دریا سے گزر آتا ہے

فاصلہ سات سمندر سے زیادہ ہے سلیمؔ
دل تو ملنے کے تصور سے ہی بھر آتا ہے

سلیم فوز

Saleem Fauz