غزل
جنت نہیں تو کوئے بتاں کچھ نہ کچھ تو ہو
تسکین دل کو اپنی یہاں کچھ نہ کچھ تو ہو
آنکھوں میں اشک لب پہ فغاں کچھ نہ کچھ تو ہو
راز اس پہ درد دل کا عیاں کچھ نہ کچھ تو ہو
او بے نیاز ایک اچٹتی ہوئی نظر
دل کو بھی زندگی کا گماں کچھ نہ کچھ تو ہو
چشم کرم نہیں نہ سہی زہر ہی سہی
لیکن علاج درد نہاں کچھ نہ کچھ تو ہو
احساس زندگی کے لئے اس جہان میں
فکر جہاں کہ عشق بتاں کچھ نہ کچھ تو ہو
کچھ دل کی دھڑکنوں کا مداوا بھی چاہئے
دست سبک کہ سنگ گراں کچھ نہ کچھ تو ہو
اے شوقؔ بے سبب تو غزل خوانیاں نہیں
تم بھی قتیل چشم بتاں کچھ نہ کچھ تو ہو
شوق ماہری