جو طورِ گلستاں اس دور میں یکسر بدل جائے
کہیں ایسانہ ہوکہ پھول بھی پتھرمیں ڈھل جائے
محبت دل کی دھڑکن کاش اتنی تیز تر کردے
بدن بھی روح کی رفتار سے آگے نکل جائے
تلاشِ صبحِ نو اس تیرگی کو یوں کچل ڈالے
اندھیرا جاتے جاتے اک نیا سورج اُگل جائے
کرو ایسی صداقت تشنگیِ شوق میں پیدا
کہ اک ٹھوکر سے رہگِ زیست میں زمزم ابل جائے
بچالو سِحرِ چشمِ آبگیں سے میکدہ اب تو
کہ جادو آنکھ کا بادہ کشوں پر بھی نہ چل جائے
پلائی کیوں ملاوٹ کی مئے گلفام اے ساقی
کہیں دو گام چل کر ہی نہ وہ کافر سنبھل جائے
ہے لازم احتیاطِ وصلِ قرطاس و قلم راشد
تصوّر کا حسیں خاکہ نہ اِک پیکر میں ڈھل جائے
راشد حسین راشد