جگنو، ہلال، شمس، ستارے لگے چراغ
بے نور ساعتوں کو سجانے لگے چراغ
وارفتگئ شوق سے آشفتگی تلک
دشتِ درونِ ذات چمکنے لگے چراغ
دیکھا عجیب ربط حیات و ممات میں
روکی ہوا نے سانس تو جلنے لگے چراغ
پھیلا ہے روشنی کا دھواں طاق طاق میں
یہ کیسی تیرگی سی اگلنے لگے چراغ
کوئے مزارِ یار چراغاں کے واسطے
آنکھوں سے مثلِ اشک نکلنے لگے چراغ
افتادِ طبع کھو گئی افتادِ وقت میں
سورج کی روشنی سے بہلنے لگے چراغ
پیہم تغیرات کی جادوگری نہ پوچھ
روئے سموم تند بھی جلنے لگے چراغ
سورج ہوا نڈھال تو مقدور بھر سہی
تاریکیوں کا زہر نگلنے لگے چراغ
امر روحانی