خطاؤں پر شفاعت کی ردائیں ڈالنے والے
شبِ معراج بھی امت کی خاطر سوچنے والے
طہارت بخشنے والے
دلوں کو پھیرنے والے
تمہارے دم سے دنیا کو ملی
تفریقِ خیر و شر
زمیں والوں کو جینے کا چلن تم نے سکھایا ہے
تمہاری شخصیت اعلیٰ نمونہ پیش کرتی ہے
سلیقہ تم سے قائم ہے
محبت تم سے قائم ہے
بیانِ اسوۂ حسنیٰ
پرے ہے لفظ و معنی سے
قلم محدود ہے میرا
زباں محدود ہے میری
تم ایسی ذات اقدس ہو
بیاں ممکن نہیں جس کا
جسے خیر البشر کے نام سے
حق نے نوازا ہے
ایس ایم عقیل