خوابِ غفلت میں نہیں ہیں ہم سدا بیدار ہیں
آپ اک آواز دیں چلنے کو ہم تیار ہیں
اپنے اپنے راستے چل دیں مناسب ہے یہی
اب نبھانے کے نظر آتے نہیں آثار ہیں
کون کتنا راہ پر ہے کون کتنا ہے غلط
چھوڑیے سرکار اب یہ فیصلے دشوار ہیں
کیسی بے چینی ہے چھائی دل کہیں لگتا نہیں
خود سے ہم منہ موڑتے ہیں خود سے ہی بیزار ہیں
ان کے دل میں ہیں جہاں بھر کی کدورت رنجشیں
اس لئے لگتے ہیں وہ کہ کس قدر بیمار ہیں
اے پرندے ساتھ اپنے ہم کو بھی لے چل کہیں
اب پروں کو کھول کر ہم اڑنے کو تیار ہیں
تو سمجھتا ہی نہیں ہے کیسے سمجھائیں تجھے
ہم بھی تیرے منتظر ہیں طالبِ دیدار ہیں
وہ پلٹ کر آ نہیں سکتے تو بس حافظ خدا
اب نہیں آواز دیں گے ہم بہت خوددار ہیں
کوئی دلجوئی کا ساماں کوئی کرتب تو دکھا
اب ہنسی کی ہے ضرورت غمزدہ ہم یار ہیں
ہم زباں کھولیں گے بولیں گے نہیں روکے کوئی
ہم بھی زندہ ہیں یہاں پر جینے کے حقدار ہیں
آپ اپنی بات مانیں میں سنوں گی دل کی اب
کس لئے حجت ہے پھر غصے میں کیوں سرکار ہیں
بات کو مانیں نہ مانیں آپ کی مرضی پہ ہے
اپنے اپنے فیصلوں میں سب ہی خود مختار ہیں
اپنے خوابوں کی بھلا شہناز کیا تعبیر ہو
اتنا تو میں جانتی ہوں یہ نہیں بیکار ہیں
شہناز رحمت