خون دل یاں وقف مژگاں ہی رہا

غزل

خون دل یاں وقف مژگاں ہی رہا
غم ترا دست و گریباں ہی رہا

قتل ہو کر بھی دل شیدا مرا
تشنہ کام آب پیکاں ہی رہا

کام بھی یاں ہو چکا واں چارہ گر
درپئے تدبیر درماں ہی رہا

کاوش دست جنوں کو نت یہاں
شغل چاک جیب و داماں ہی رہا

وعدے غیروں سے وفا ہوتے رہے
ایک ہم سے عہد و پیماں ہی رہا

یاد میں اس چشم فتاں کی سدا
دل چراگاہ غزالاں ہی رہا

چیونٹیوں کو بھی سنا اے عیشؔ یاں
دعویٔ ملک سلیماں ہی رہا

حکیم آغا جان عیش