دلِ علیل شفا خیز آگہی مانگے

Dil e Aleel Shafa Kheez aagahi Mangay

غزل

دلِ علیل شفا خیز آگہی مانگے
خیالِ یار بھی جذبوں کی چاشنی مانگے

شبِ وصال کی نمناک وحشتوں کے عوض
فصیلِ ہجر محبّت کی روشنی مانگے

مرے خیال کی ندرت کمال کو پہنچے
ترے جمال کی خوشبو بھی تازگی مانگے

مقامِ فخر کہ فاتح سے اک دلِ مفتوح
جو طشتِ خیر میں اتری وه دوستی مانگے

قرارِقلب سیہ رات کا تمنائی
خمارِ دشتِ جنوں عکسِ چاندنی مانگے

دوانہ عقل سے انصاف کا تقاضہ کرے
زمانہ عشق سے بے باک راستی مانگے

اسے کہو کہ زمانہ وفا نہیں کرتا
اسے کہو کہ وفا یاب زندگی مانگے

وہ شخص آج بھی اکھڑ مزاج ہے لیکن
ہمیشہ عالی سے اندازِ دلبری مانگے

تمہی کہو کہ بھلا کیسے وه صلہ دے گا
یہ دردِدل سے جو اعزازِ بندگی مانگے

شائستہ کنول عالی

Shaista Kanwal Aali