غزل
دل کو جب آگہی کی آگ لگے
تب سخن سوچ کو سہاگ لگے
ان بھری بستیوں کے لوگ مدام
ان ہری کھیتیوں کو بھاگ لگے
منتشر ہو تو گر میں گیان کہاں
سر ملیں سب تو ایک راگ لگے
ہونٹ گوری کے رس بھرے انجیر
لٹ کا لچھا لٹک کے ناگ لگے
کشٹ ٹوٹے تو شاعری چھوٹے
آب ٹھہرے تو جم کے جھاگ لگے
ہاتھ کنگن کو آرسی کیسی
گیت کی گت کو لے کی لاگ لگے
نیا باندھو ندی کنارے سکھی
چاند بیراگ رات تیاگ لگے
دن برہ کے کٹیں تو پی پلٹیں
بن میں سرسوں جگے تو پھاگ لگے
جوگ سنجوگ کے بناں خالی
دودھ کو بھی دہی کا جاگ لگے
ناصر شہزاد