غزل
دن جنوں کے آن پہنچے ہوشیاراں الوداع
فصل گل نزدیک آئی اے گریباں الوداع
میکدہ سے قصد مکہ کا کیا ہے کیا کریں
توبہ ہم سے ہو گئی اے مے پرستاں الوداع
نئیں ہمیں فرصت کہ اب کے سال باندھیں آشیاں
باغباں کا حکم یوں ہے اے گلستاں الوداع
ہم سے تھا ویرانہ ٹک آباد سو ہم بھی چلے
اب خدا حافظ تمہارا اے غزالاں الوداع
ناتوانی سے اسے جور و جفا کی تاب نئیں
اب یقیںؔ بوڑھا ہوا اے نوجواناں الوداع
انعام اللہ خاں یقیں