دیکھوں تو نظر آتے ہیں آثار مکمل – Daikhu tou nazar atay hain asaar mukammal

دیکھوں تو نظر آتے ہیں آثار مکمل
غم دے کے مجھےجائے گا غمخوار مکمل

میں ایک محبت کا ادھورا سا فسانہ
اے کاش وہ کردے مجھے اِک بار مکمل

سپنوں کا یہ گھر پائے گا تکمیل بھلا کیا
جب در ہی مکمل ہے نہ دیوار مکمل

قسمیں ہیں کبھی وعدے کبھی جھوٹی تسلی
کرنا ہے تو کر دے مجھےاِک بار مکمل

کچھ خط ہیں تو کچھ درد سے روتی ہوئی یادیں
بخشے ہیں محبت نے یہ آزار مکمل

بچپن کی وہ گلیاں وہ حسیں لوگ وہ چہرے
پھرتے ہیں نگاہوں میں وہ ادوار مکمل

یا کردے مری ذات کی تکمیل ہی انؔور
یا کر دے مجھے آکے تو مسمار مکمل

انور ضیا مشتاق