ذکرِ نبی کے صدقے، برگِ زبان مہکا
لفظوں کی مہکی مالا، لطفِ بیان مہکا
مرہم بدست آیا، ایسے وہ نام لب پر
رنج و الم مٹایا، زخمِ دہان مہکا
مامور ہو گئیں جب عشقِ نبی پہ سانسیں
ایسا لگا خزاں میں سارا جہان مہکا
اک سبز رُو اجالا یکدم دھیاں میں آیا
پھر کیا کوئی مہکتا، ایسا، مکان مہکا
الفاظ ہاتھ باندھے آگے کھڑے ہوئے تھے
لکنت زباں کی ٹوٹی حسنِ بیان مہکا
یثرب بنا، مدینہ دورِ بہار آیا
پیوستہ ء خزاں تھا غنچہ سمان مہکا
وہ نورِ اولیں جب مسند نشیں ہوا تب
اندھیرے چھٹ گئے سب طاقِ گمان مہکا
شائستہ سحر