Rehman hay Raheem Khuda to Haseeb hay
حمدِ باری تعالیٰ
رحمٰن ہے رحیم خدا تو حسیب ہے
شہہ رگ سے اپنے بندوں کے تو ہی قریب ہے
سانسوں پہ اختیار ہے دھڑکن پہ اختیار
کرتا ہے اپنے بندوں سے تو پیار بے شمار
دریا بہائے تو نے سمندر بہا دیے
اور آسماں پہ چاند ستارے سجا دیے
مٹی سے تو نے چاک پہ انساں بنا دیا
اشرف کے مرتبے سے اسے پھر سجا دیا
عقل و شعور قوتِ گویائی بخش دی
اور قیمتی سماعت و بینائی بخش دی
قاصر ہوں تیری شان میں لکھنے سے کچھ خدا
کردے تو مجھ کو حرف کی دولت حسیں عطا
کہتی رہوں میں نعت کے اشعار جھوم کر
طیبہ کی سرزمین کو پلکوں سے چوم کر
بندی ہے شاز کہنے کو ہرچند بے نشاں
کہتی ہے شعر اس لیے کہ تو ہے مہرباں
شاز ملک
Shaaz Malik