غزل
رچی دماغ میں ہو جس کے اس بدن کی بو
خوش آوے کب اسے نسرین و نسترن کی بو
وہ جس نے سونگھی ہو اک دفعہ اس کے تن کی بو
نہ عطر کی اسے بھاوے نہ یاسمن کی بو
ہزار جان سے مشک ختن ہو حلقہ بگوش
جو سونگھ لے کبھی اس زلف پر شکن کی بو
بسا ہو دل میں بھلا جس کے وہ گل خوبی
پسند آئے اسے کس طرح چمن کی بو
مشام جاں ہوئی یعقوب کی وہیں تازہ
جو پہنچی مصر سے یوسف کے پیرہن کی بو
کہاں ہے سیب میں سیب ذقن کی سی بو باس
جہاں میں روح فزا ہے تو ہے ذقن کی بو
مشام جاں کو تر و تازہ عیشؔ کرتی ہے
جہاں کے باغ میں گلدستۂ سخن کی بو
حکیم آغا جان عیش