رہِ جفا کی نشانی میں لکھ دیا تجھ کو
کہ اپنی زندہ کہانی میں لکھ دیا تجھ کو
کتابِ یادِ نہانی میں لکھ دیا تجھ کو
وفا نے یوسفِ ثانی میں لکھ دیا تجھ کو
خموشیوں سے نہیں نام لکھ سکی تیرا
تو اب کے شعلہ بیانی میں لکھ دیا تجھ کو
یہ انگلیاں تو اسے روکتی رہیں لیکن
قلم نے زورِ بیانی میں لکھ دیا تجھ کو
زبان چپ تھی کہ تھا پاسِ حرمتِ الفت
تو دل نے چشم کے پانی میں لکھ دیا تجھ کو
وفورِ جذب کے آگے نہ کوئی پیش چلی
تڑپتی یاد پرانی میں لکھ دیا تجھ کو
اڑا کے لائی صبا تیری خوشبوئیں ایسے
کہ میں نے رات کی رانی میں لکھ دیا تجھ کو
متاعِ درد نے اکسایا اس طرح سے نسیم
کہ میں نے ظلم کے بانی میں لکھ دیا تجھ کو
نسیم بیگم نسیم