زخمِ دِل جب ہرا سا لگتا ہے

غزل

زخمِ دِل جب ہرا سا لگتا ہے
وہ ستمگر، بَھلا سا لگتا ہے

کل کہیں جانِ جاں نہ بن جائے
اجنبی ، آشنا سا لگتا ہے

کیا کریں اُس کی بے رُخی کا گِلہ
شہر بھر بے وفا سا لگتا ہے

اُس کے لہجے کا زہر تو دیکھو
آدمی دِل جلا سا لگتا ہے

وہ رگِ جاں سے بھی قریب سہی
پاس رہ کر، جُدا سا لگتا ہے

ہم سے نا خوش نہ ہو خُدا کے لئے
سارا عالم خفا سا لگتا ہے

آپ کیوں بدگُماں ہیں باقر سے
آدمی تو بَھلا سا لگتا ہے

باقرزیدی
​