سمائیں آنکھ میں کیا شُعبدے قیامت کے

سمائیں آنکھ میں کیا شُعبدے قیامت کے
مِری نظر میں ہیں جَلوے کسی کی قامت کے

یہاں بَلائے شبِ غم، وہاں بہارِ شباب !
کسی کی رات، کسی کے ہیں دِن قیامت کے

سِتارے ہوں تو سِتارے، نہ ہوں تو برقِ بَلا !
چراغ ہیں تو یہ ہیں بےکسوں کی تُربت کے

اُلٹ دِیا غمِ عِشقِ مجاز نے پردہ
حجابِ حُسن میں کُچھ راز تھے حقِیقت کے

اُڑا لئے ہیں کُچھ انداز موت نے فاؔنی
عتابِ یار کے، روزِ سیاہِ فُرقت کے

شوکت علی خاں فانؔی بدایونی​