سپولے جوگیوں نے اس لیے کِیلے نہیں ہوں گے
سمجھتے تھے کہ یہ حشرات زہریلے نہیں ہوں گے
جو چبھتے ہی نہ ہوں ان کو بھی کوئی خار کہتا ہے
اگر ہیں خار تو کیا خار نوکیلے نہیں ہوں گے
ہم ایسے لوگ جو پل پل غموں کا زہر پیتے ہیں
تو جانِ من ! ہمارے جسم کیا نیلے نہیں ہوں گے
مجھے سیراب کرنے کا ارادہ ملتوی کر دے
ترے دریا سے میرے ہونٹ بھی گیلے نہیں ہوں گے
یہ ریگستان کا طوفاں بڑا من زور ہوتا ہے
اگر تاخیر سے لوٹے تو یہ ٹیلے نہیں ہوں گے
رانا سعید دوشی