غزل
ضبط کے با وصف دل کیوں بے ادب ہونے لگا
کیوں نگاہوں سے عیاں رنگ طلب ہونے لگا
کیا ہوئی میری وفاؤں کی عقیدت کیا ہوئی
بے وفائی کا گلہ کیوں زیر لب ہونے لگا
بے قراری دل کی فطرت ضبط غم میری سرشت
کشمکش کا تازہ ساماں روز و شب ہونے لگا
دل کی خوشنودی اگر منظور ہے خاموش رہ
جوش غم تو آج کل کچھ بے ادب ہونے لگا
فطرتؔ اور بے مہریٔ تقدیر کا شکوہ غلط
یہ نہیں ہونے کا اے دل ایسا کب ہونے لگا
عبدالعزیز فطرت