عشق اس بار یوں ہوا مجھ کو

Ishq is Baar Youn Howa Mujh Ko

غزل

عشق اس بار یوں ہوا مجھ کو
رہ گیا قیس دیکھتامجھ کو

تیری گلیوں کی خاک اڑانی ہے
رقص کرنا ہے جا بجا مجھ کو

اس کے چہرے کی چاندنی پا کر
چاند لگنے لگا دیا مجھ کو

شوق تھا نا تجھے اعانت کا
گر گیا ہوں تو اب اٹھا مجھ کو

میں نے حد کر دی اعتبار کی جب
اس نے اندھا سمجھ لیا مجھ کو

کر دیا پھر سپردِ شب اس نے
دے کے تحفے میں اک دیا مجھ کو

میں تو نکلا تھا کھوج میں اپنی
مل گیا راہ میں خدا مجھ کو
علی صدف

Ali Sadaf