عشق خوننابہ فشانی جو نہیں تو کیا ہے
دل کی تجویز دوانی جو نہیں تو کیا ہے
کیوں نہ اے دوست کلیجے سے لگائے رکھوں
داغِ دل اس کی نشانی جو نہیں تو کیا ہے
وہ بھی کیا موجِ لہو ہے کہ جو تھم تھم کے بہے
گرم چشموں کی روانی جو نہیں تو کیا ہے
چھائی چھائی ہوئی مقتل پہ نشے کی صورت
میرے قاتل کی جوانی جو نہیں تو کیا ہے
کوئی مبہم سا تصور کوئی مدھم سی خلش
ہجر کی رات سہانی جو نہیں تو کیا ہے
بن گئے میرے سوالوں کا دل آویز جواب
تیری آنکھوں کی زبانی جو نہیں تو کیا ہے
اے مرے ہمدمِ دیرینہ مرے شعروں میں
عُمرِ رفتہ کی کہانی جو نہیں تو کیا ہے
جاں نثار اختر