عشق سرمایہ تھا، نقصان کسی کا نہ ہوا

عشق سرمایہ تھا، نقصان کسی کا نہ ہوا
باغِ خوشرنگ جو ویران کسی کا نہ ہوا
. . . . . . . . . . .
لفظ میں راکھ رکھی، ہجر کمایا کس نے
جیسا ہے میر کا دیوان کسی کا نہ ہوا
. . . . . . . . . .
مجھ سے دیوار تو کیا بننا تھی در بھی نہ بنا
میں کہ رستہ رہا، دالان کسی کا نہ ہوا
. . . . . . . . . . . . .
دست و پا چِھل گئے اے عمر کی تتلی سب کے
کس کا جینا ہوا آسان؟ کسی کا نہ ہوا
. . . . . . . . . . . . . . .
اپنے دکھ درد لکھے اپنی ہی خوشیاں لکھیں
میرے اشعار پہ احسان کسی کا نہ ہوا
. . . . . . . . . . . . .
ایک دو ہاتھ تو تھے سرخ گلابوں جیسے
دل کہ تھا ہجر کا گلدان، کسی کا نہ ہوا
. . . . . . . . . . . . . .
وقت نے مال و زر و جاہ بکھیرا ایسے
اتنا باندھا ہوا سامان کسی کا نہ ہوا
. . . . . . . . . . . . . . . .
جیسا ہر روز نیا مجھ میں کھنڈر بنتا ہے
ایسا اک قریہِ سنسان کسی کا نہ ہوا
. . . . . . . . . . . . . . .
مجھ کو قیوم کسی نے بھی نہ پہنا، اوڑھا
مجھ میں ریشم کا تھا اک تھان کسی کا نہ ہوا

قیوم طاہر