فرق تجھ سے ہے اک ذرا مجھ میں

Farq Tujh say Hay ik Zara Mujh Main

غزل

فرق تجھ سے ہے اک ذرا مجھ میں
سنگ تجھ میں ہے، آئنہ مجھ میں

بے بسی کی فقط کتاب نہیں
‘عزمِ محکم’ بھی ہے لکھا مجھ میں

فہم و دانش کا نور ہوں یکسر
فکر کا جلتا ہے دیا مجھ میں

مہر و ایثار کا سمندر ہوں
اور دریا ہے پیار کا مجھ میں

مجھ میں جھرنا ہے نرم خوئی کا
ساتھ لاوا بھی ہے چھپا مجھ میں

میرے قدموں تلے ہے جنت بھی
اور دوزخ کا راستہ مجھ میں

میرے ہر غم کا تُو مسیحا ہے
تیرے ہر دکھ کی ہے دوا مجھ میں

سب رویے پہ تیرے ہے موقوف
خار بودے یا گل کھلا مجھ میں

تبسؔم اعظمی

Tabasum Aazmi