لمس آہٹ کے ہواؤں کے نشاں کچھ بھی نہیں
خواب ہی خواب ہے یہ شہر یہاں کچھ بھی نہیں
کوئی گزری ہوئی شاموں میں کبھی چمکا تھا
اس گھنی شب کے اندھیرے میں عیاں کچھ بھی نہیں
چند ساعت کے ستارے ہیں سر بام طلوع
دن اتر جائیں تو پھر گھر کا سماں کچھ بھی نہیں
اک خموشی ہے لیے حیرت صد نقش و نگار
ورنہ بدلے ہوئے موسم کی زباں کچھ بھی نہیں
آسماں آج تری چھاؤں میں آ بیٹھی میں
اب مرے سر پہ ترا کوہ گراں کچھ بھی نہیں
شاہدہ حسن