مرے رستے سے ہٹائے مجھ کو
کون اب مجھ سے بچائے مجھ کو
بیچ دے خود کو مرے ہاتھ کوئی
اور بدلے میں کمائے مجھ کو
بڑھ رہے ہیں مری جانب کچھ لوگ
کوئی چُپ رہنا سکھائے مجھ کو
کون ہے جو مری مرضی کے خلاف
اپنے قدموں میں بٹھائے مجھ کو
مجھ کو دھتکارے ، مگر وہ پہلے
بن کے مجھ ایسا دکھائے مجھ کو
نظر آتا نہیں مَیں کیوں اُس کو
وہ جو ہر سُو نظر آئے مجھ کو
صاحبِ فن ہے ، سبھی جانتے ہیں
جیسے چاہے وہ بنائے مجھ کو
مری تقدیر میں کس نے یہ لکھا
آگ اندر کی جلائے مجھ کو
کیسے انکار کروں ، سوچتا ہوں
پیش کرتا ہے وہ چائے مجھ کو
پھر سے تعمیر کی صورت نہ رہے
یُوں کبھی کوئی مٹائے مجھ کو
ہو رہے ہیں جو ہر اک سَر پہ محیط
کیوں کھٹکتے ہیں وہ سائے مجھ کو
مجھ کو ازبر ہیں تقاریر اُس کی
اب وہ کچھ کر کے دکھائے مجھ کو
آنکھوں آنکھوں میں سب اسباقِ وفا
اُس نے عادِل ہیں پڑھائے مجھ کو
عادِل یزدانی چنیوٹ