مرے علاوہ مرے قافلے میں کوئی نہیں

مرے علاوہ مرے قافلے میں کوئی نہیں
سو خوش ہوں اب کہ مرے راستے میں کوئی نہیں

سبھی کے پاس ھے سب کچھ مزے میں کوئی نہیں
شراب پی تو رھے ہیں نشے میں کوئی نہیں

وہ جن کے ساتھ گزرتے تھے میرے لیل و نہار
اب ان کا ساتھ تو کیا رابطے میں کوئی نہیں

بڑی طویل تھی فہرستِ دشمناں تو مگر
خدا کا شکر مرے حافظے میں کوئی نہیں

اگر یہ دل ھے ترا آئینہ تو پھر سن لے
میں کیسے مان لوں اس آئینے میں کوئی نہیں

سہیل اقبال