میں ایک خواب ہوں اور بالیقیں پڑا ہوا ہوں

میں ایک خواب ہوں اور بالیقیں پڑا ہوا ہوں
کہیں گیا تو نہیں ہوں وہیں پڑا ہوا ہوں

کوئی بتائے تو شاید سمجھ میں آئے مجھے
پڑا ہوا کہ شاید نہیں پڑا ہوا ہوں

مجھے تلاش تو کر آئنے سے ہٹ کر بھی
ترے جمال میں شاید کہیں پڑا ہوا ہوں

بھٹک نہ جائے جواہر تلاشنے والا
اسے کہو کہ میں زیرِ زمیں پڑا ہوا ہوں

میں بے مثال تھا بالائے خاک بھی مظہر
میں زیرِ خاک بھی کتنا حسیں پڑا ہوا ہوں

مظہر نیازی