نبض جاں آپ کی نقش جاں آپ کا
میری آنکھوں میں خواب گراں آپ کا
ہے سمندر میں موج رواں آپ کی
آسمانوں پہ ابر رواں آپ کا
آپ کی رحمتیں سب پہ سایہ فگن
ہر مکیں آپ کا ہر مکاں آپ کا
پھول بھی آپ کے نکہتیں آپ کی
باغ بھی آپ کا باغباں آپ کا
میری آنکھوں میں سب رونقیں آپ کی
سر پہ ہے سایہء مہرباں آپ کا
جب تپش مجھ کو سورج کی کھانے لگی
سر پہ چھانے لگا سائباں آپ کا
میرے پیارے نبی آخری سانس تک
نعت پڑھتا رہے نعت خواں آپ کا
میری کشتی کا طوفاں بگاڑے گا کیا
میری کشتی پہ ہے بادباں آپ کا
وصف کیا ہوں کسی سے بیاں آپ کے
رتبہ قرآن سے ہے عیاں آپ کا
آپ کی گفتگو ہے فصاحت کی جاں
کوئی دیکھے تو حسن بیاں آپ کا
فرش سے عرش تک آپ ہی آپ ہیں
یہ جہاں آپ کا وہ جہاں آپ کا
رونق حیات