نظر جھکا کے کرے جب خطاب خاموشی
بہت ضخیم لکھے ہے کتاب۔۔۔۔۔۔ خاموشی
یہ مانتا ہوں خموشی عظیم حکمت ہے
ہو ظلم عام تو پھر ہے عذاب خاموشی
جہاں ببانگِ دہل حق کی بات کہنی ہو
وہاں پہ جرم ہے سنئے جناب خاموشی
کبھی جو یورشِ غم توڑ دے وجود اس کا
برسنے لگتی ہے مثلِ سحاب۔۔۔۔۔۔ خاموشی
یہ مصلحت کے تقاضے بہت سمجھتی ہے
بدلتی رہتی ہے اکثر نقاب۔۔۔۔۔۔۔۔ خاموشی
ذرا جو ضرب پڑے۔۔۔ اِس کے دو رخے پن پر
بہت ہی کھاتی ہے پھر پیچ و تاب خاموشی
سفید پوشوں کی عزت پہ۔۔۔۔۔۔ آنچ آئے گی
جو لب کشا ہوئی عزت مآب۔۔۔۔۔۔ خاموشی
جب اس کو عدل کے بدلے سزائیں ملتی ہیں
کرے ہے جرم کا تب ارتکاب۔۔۔۔۔۔۔۔۔ خاموشی
اقبال گوہر