وحشت۔دل در و دیوار پہ رقصاں کیوں ہے
میری تنہائی مرے حال پہ خنداں کیوں ہے
تجھ سے چھوٹا ہے نہ چھوٹے گا کبھی رشتہءدرد
وائے دیوانگیء شوق پشیماں کیوں ہے
تو ہمیشہ سے مکیں ہے مرے ویرانے میں
محفل۔خواب میں اک رات کا مہماں کیوں ہے
ہر نفس پھول محبت کے کھلائے ہیں مگر
موسم۔گل کا مقدر در۔زنداں کیوں ہے
یوں گزاری ہے شب۔ہجر کہ کچھ یاد نہیں
صبح دم چاک ہواؤں کا گریباں کیوں ہے
میرے آنگن میں اندھیروں کی اداسی بو کر
اے مرے دوست ترے گھر میں چراغاں کیوں ہے
شائستہ مفتی